ЦВК апублікаваў лагатып будучых прэзідэнцкіх выбараў, а потым выдаліў. Рэч у даце

Цэнтрвыбаркам 24 кастрычніка апублікаваў у сваім тэлеграм-канале лагатып блізкіх выбараў прэзідэнта, якія пройдуць 26 студзеня 2025 года. Неўзабаве выяву выдалілі. Дата ў арыгінале была іншая — 25 лютага 2025 года.

На першапачатковым лагатыпе адзначалася, што выбары пройдуць 25 лютага 2025 года. Прыкладна праз пяць хвілін выява знікла з тэлеграм-канала ЦВК. На той момант яе паспелі распаўсюдзіць беларускія прапагандысцкія рэсурсы.

Пазней прэс-служба Цэнтрвыбаркама апублікавала выпраўленую версію лагатыпа, на якім была дата 26 студзеня 2025 года. Усё астатняе засталося ранейшым.

«Усё вельмі ёміста, ярка і стылёва», — пракаментаваў візуальную канцэпцыю начальнік аддзела апарата ЦВК Беларусі Сяргей Шмарлоўскі.

Нагадаем, аб’яднанне былых сілавікоў BELPOL са спасылкай на свае крыніцы расказала, што сёмыя прэзідэнцкія выбары ў Беларусі запланаваныя на 23 лютага. Аднак 23 кастрычніка Палата прадстаўнікоў зацвердзіла іншую дату — 26 студзеня 2025 года.

Кіраўнік ЦВК Ігар Карпенка раней казаў, што разглядаюцца чатыры магчымыя даты, але «для таго каб іх агучваць, трэба правесці кансультацыі».