На МАЗе запусцілі вытворчасць аўтобусаў. Але ёсць рызыка, што прадаць іх будзе складана

Мінскі аўтамабільны завод (МАЗ) запусціў новы корпус па вытворчасці аўтобусаў, піша «Беларусь сегодня». Плануецца, што за год ён будзе выпускаць па 3 тысячы адзінак пасажырскай тэхнікі. Выйсці на такую загрузку плануюць у наступным годзе. Сёлета прадпрыемства сутыкнулася з сур’ёзным падзеннем продажаў на галоўным экспартным рынку — у Расіі.

На прадпрыемстве новы цэх называюць «інавацыйным праектам». Будавалі яго з 2023 года, а ў красавіку на новых плошчах ужо сабралі першыя 12 машын.

Яшчэ 50 аўтобусаў плануюць выпусціць у траўні, паведаміў гендырэктар МАЗа Валерый Іванковіч. Ужо ў траўні аб’ём выпуску адпавядае гадавому ўзроўню ў 600 машын.

На вытворчасці будуць працаваць 1223 чалавекі. Завод абсталяваны трыма аўтаномнымі зборачнымі лініямі, спецыялізаваным зварачна-нарыхтоўча-механічным цэхам, а таксама боксамі для дыягностыкі і наладкі аўтобусаў. Агульныя інвестыцыі ў праект перавысілі 300 млн рублёў.

З 1 красавіка функцыянуюць два цэхі завода. Першая сабраная мадэль — аўтобус трэцяга пакалення МАЗ-303047.

Нагадаем, сёлета МАЗ сутыкнуўся з сур’ёзным падзеннем продажаў на расійскім рынку. У сакавіку туды прадалі 24 новыя аўтобусы — амаль у 3,3 разу менш, чым за год да таго.

Аляксандр Лукашэнка ў студзені гэтага года патрабаваў, каб прадпрыемства нарошчвала продажы на экспарт. «Сёлета мы вырабім і прададзім 2,3 тысячы аўтобусаў. Гэта добрыя лічбы. Пад 2 тысячы кожны год дадавайце, і тады не будзе праблем з працай і працаўладкаваннем не толькі ў вас, але і ў вашых дзяцей», — заяўляў палітык.

Чытайце таксама